Un operativo da Garda Civil saldouse coa incautación dunha arma, datada do século XIX, e que se ofertaba como ‘escopeta rústica trampa rompepernas’ nun establecemento da Terra Chá dedicado á compravenda de bens usados e antigüidades. A actuación enmárcase na operación ‘Pandora V’, destinada á loita contra o tráfico ilícito de bens culturais na Unión Europea.

Os axentes intervineiron preventivamente a arma que se atopaba á venda neste local, ao tratarse dunha peza que puidese ser susceptible de efectuar disparos. Así, remitiuse ao departamento de balística do laboratorio de criminalística para a súa análise, avaliación e elaboración de informe pericial que acredite que poida tratarse dunha arma en funcionamento.

O informe cualifica o obxecto intervido como “arma artesanal en avanzado estado de oxidación” clasificándoo como arma curta da categoría 1, salvo acreditación de antigüidade anterior ao 1890, nese caso pasaría a ser de categoría 6.2. Por iso, o propietario foi proposto para unha infracción tipificada na lei de seguridade cidadá.