Unha persoa faleceu este domingo en Lugo tras saírse da vía e dar varias voltas de campá. O outro ocupante do vehículo foi trasladado ao HULA polos servizos sanitarios. Tal e como comunicou o 112 Galicia, o sinistro tivo lugar ao redor das 16.30 horas desta tarde e foron varios particulares os que contactaron co centro de emerxencias para pedir axuda.
Todos os alertadores relataron que un coche que circulaba pola A-6, quilómetro 501, ao seu paso por Pías, dirección Coruña, en Lugo, deu varias voltas de campá. Ademais, indicaban que había persoas no seu interior posiblemente atrapadas. Ata o lugar desprazáronse persoal sanitario do 061, os bombeiros de Lugo, a Garda Civil de Tráfico, Policía Local e persoal de mantemento da vía.
Á súa chegada, os sanitarios confirmaron que o copiloto do vehículo resultou falecido e tivo que ser excarcerado polos bombeiros. Pola súa banda, o condutor foi evacuado polos particulares que se atopaban próximos ao accidente e posteriormente trasladado ao HULA.
