Catro persoas resultaron feridas por mor dunha colisión múltiple rexistrada na madrugada deste martes na A-6, ao seu paso polo municipio lucense de Baralla. Segundo informou o CIAE 112 Galicia, no accidente víronse implicados catro turismos, que chocaron á altura do punto quilométrico 464, en sentido A Coruña. Un dos vehículos quedou envorcado sobre a mediana, polo que nun primeiro momento se pensou que podería haber persoas atrapadas.
Por este motivo, solicitouse a intervención dos bombeiros de Sarria. Unha vez no lugar dos feitos, os efectivos comprobaron que todos os ocupantes estaban liberados e accesibles, polo que non foi preciso realizar tarefas de excarceración. Ata o punto desprazouse tamén persoal de Urxencias Sanitarias de Galicia-061, que trasladou as catro persoas feridas con lesións de diversa consideración.
