Efectivos do Grupo Operativo Nocturno da Policía Local, en coordinación con axentes da Policía Nacional, levaron a cabo inspeccións en tres establecementos de ocio nocturno da cidade, localizados nas inmediacións da praza de Augas Férreas e da rúa Mariña Española, detectando en todos eles irregularidades de distinta gravidade. Os axentes procederon á identificación de 29 persoas, realizando unha acta-denuncia por tenencia de droga en establecemento público (cocaína).
No local situado canda a praza de Augas Férreas, os axentes comprobaron que o responsable do establecemento non puido acreditar no momento da inspección a contratación do seguro de responsabilidade civil obrigatorio, polo que se formulou a correspondente denuncia. Ademais, os extintores de emerxencia non se atopaban nun lugar visible nin accesible e presentaban a carga caducada, o que motivou unha segunda denuncia. Detectáronse así mesmo 4 traballadores que, nese momento, non puideron acreditar relación contractual en vigor coa empresa.
Na zona da Mariña Española, a inspección estendeuse a dous locais con resultados de carácter similar. Ambos foron denunciados por non acreditar ter concertado seguro de responsabilidade civil e por non acreditar a relación contractual dos seus traballadores; a maiores, un foi denunciado por ter os extintores caducados e carecer de botiquín, e o outro por non presentar a habilitación preceptiva o controlador de accesos.
