A Garda Civil investiga a unha muller como presunta autora dun delito de furto, tras levar o diñeiro dunha carteira que alguén deixara esquecida nun ‘box’ de lavado dunha gasolineira de Castro de Rei.
Os feitos ocorreron este mes nunha estación de servizo do polígono industrial de Castro Ribeiras de Lea. Alí, unha moza que se dispuña a lavar o seu vehículo deixou a súa carteira con 790 euros apoiada sobre a máquina de moedas e, cando se foi, esqueceuna.
Minutos despois, outro coche accedeu a ese ‘box’ de lavado e as cámaras da estación de servizo captaron como a acompañante que ía no vehículo colleu a carteira, meteuna no coche e, tras quitar o diñeiro que había dentro, volveuna a colocar no mesmo lugar.
Posteriormente, o condutor dun terceiro vehículo que tamén entrou no ‘box’ de lavado, recolleu a carteira e devolveuna á súa propietaria, a quen coñecía. Así, a muller comprobou que faltaba o diñeiro.
As cámaras de vixilancia permitiron identificar á autora do furto, que está investigada pola Garda Civil, As dilixencias foron remitidas ao xulgado.
