Unha muller, que se atopaba retida polo seu compañeiro de piso, foi liberada por axentes da Policía Nacional de Lugo o pasado domingo. Non existía unha relación amorosa entre eles.
Tal e como confirmou a Policía Nacional, os feitos ocorreron o pasado domingo, 19 de abril. Os axentes atopábanse patrullando pola Rúa Santo Graal cando viron a unha muller facer acenos desde unha xanela, indicándolles que se detivesen. Desde alí, a muller manifestou que levaba encerrada desde a noite anterior polo seu compañeiro de piso, e tamén que este a agredira e ameazara.
A continuación, os axentes entraron ao inmoble, liberando e protexendo á muller e procederon a deter ao home, por un suposto delito de detención ilegal e ameazas. Finalmente, o detido pasou o luns a disposición xudicial, quedando en liberdade cunha orde de afastamento.
