Un incendio rexistrado na tarde deste mércores nun piso de Lugo obrigou a desaloxar parcialmente os veciños dun edificio e provocou o traslado de dúas persoas por inhalación de fume. Segundo informou o 112 Galicia, o primeiro aviso produciuse arredor das 15.40 horas, cando un particular alertou de que saía unha gran cantidade de fume polas xanelas dun piso situado nun inmoble da avenida Reverendo Xosé Fernández Núñez.
Tras recibir o aviso, a Sala de Operacións do 112 mobilizou ao 061, aos Bombeiros de Lugo e ás policías Nacional e Local. Os equipos de emerxencia indicaron que foi necesario desaloxar parcialmente o edificio mentres se realizaban as tarefas de extinción do lume. Como consecuencia do incendio, ardeu a cociña da vivenda afectada e dúas persoas tiveron que ser trasladadas polos servizos sanitarios debido á inhalación de fume.
