- Advertisement -
Un incendio orixinado durante a madrugada deste xoves calcinou por completo unha vivenda situada no lugar da Granda, na parroquia vilalbesa de Xoibán.
Segundo trasladou o 112 Galicia, foi un particular quen se puxo en contacto coa central de emerxencias pouco antes das 10.00 horas para dar aviso deste incendio que, todo apunta, produciuse durante a noite.
Nesta comunicación, o alertante sinalaba que parecía que o lume se estaba reavivando e manifestaba que non podían acceder ao interior do inmoble.
Con esta información, desprazáronse ata o lugar os Bombeiros de Vilalba, da Garda Civil e de Protección Civil. Unha vez no punto, os bombeiros informaron de que caera o tellado da vivenda salvándose só o alboio.
