Dúas persoas, un matrimonio de avanzada idade, faleceron este martes nun accidente de tráfico ocorrido no municipio lucense de Antas do Ulla. No suceso, ocorrido esta mesma tarde, víronse involucrados un camión e un turismo. As vítimas que viaxaban neste último permanecen atrapadas no interior. O suceso tivo lugar na N-640, no quilómetro 138. Ao redor das 16.45 horas un particular contactou co servizo de emerxencias para informar da colisión.
O alertante indicaba que no interior do vehículo viaxaban dúas persoas que, ademais, permanecían atrapadas no interior. Ata alí desprazáronse Urxencias Sanitarias de Galicia-061, bombeiros de Chantada, GES de Monterroso e Garda Civil de Tráfico. Ademais, deuse aviso ao Grupo de Intervención Psicolóxica en Catástrofes e Emerxencias (GIPCE) do Colexio Oficial de Psicoloxía de Galicia. Finalmente, confirmaron o falecemento dos dous ocupantes do turismo, un matrimonio de idade avanzada.
