Un incendio orixinado esta tarde nunha nave que almacenaba palla en Palas de Rei permanece controlado desde as 18.30 horas. Os servizos de extinción seguen retirando o material para extinguir o lume por completo. Ao redor das 17.00 horas, un particular informou ao 112 Galicia de que ardía unha das naves dunha explotación gandeira en Puricelas, cuxo interior almacenaba unha gran cantidade de herba seca.
De inmediato, activouse un operativo no que participan os Bombeiros de Chantada, a Garda Civil, o GES de Monterroso e de Friol-Palas e os voluntarios de Protección Civil de Palas de Rei; tamén colabora unha dotación do distrito forestal da zona. Pouco despois das 18.30 horas, os medios confirmaron ao Centro Integrado de Atención ás Emerxencias de Galicia (CIAE) que o incendio estaba controlado e que seguían retirando aos poucos a palla para poder extinguir as chamas.
