A Policía Local de Lugo denunciou ao condutor dun ciclomotor que repartía comida a domicilio e que non tiña carné nin contrato de traballo. Segundo informa o corpo municipal, o Grupo Operativo Nocturno observou a circulación deste vehículo pola Avenida da Coruña sen iluminación, polo que os axentes procederon a darlle o alto. Cando se parou, comprobaron que o home non tiña permiso de condución porque nunca o obtivo. Así, instruíron dilixencias por delito contra a seguridade viaria.
Ademais, o condutor portaba unha mochila para o transporte de comida a domicilio e, ao ser preguntado polos axentes se tiña contrato con algunha empresa, recoñeceu que non. Identificou as empresas que lle solicitan encargos e relatou que fai o traballo e cobra en man. Os axentes requiriron a presenza do titular do ciclomotor, o cal tamén foi identificado. De feito, a Policía Local instruíu contra el dilixencias como colaborador necesario no delito contra a seguridade viaria. Así mesmo, confeccionouse o correspondente parte de intervención para remitilo a Inspección de Traballo.
