A Garda Civil detivo a seis veciños de Lugo como supostos autores dun delito de roubo con forza cometido nun centro escolar de Vilalba. En concreto, os feitos tiveron lugar o pasado mes de febreiro, cando os presuntos autores accederon ao interior do centro, forzando unha das xanelas, e subtraeron 15 computadores portátiles da aula de informática, ademais de provocar danos na porta de acceso e noutras aulas e dependencias, segundo indicou a Garda Civil nun comunicado.
A continuación, iniciouse unha investigación para identificar aos presuntos autores e tentar recuperar os efectos subtraídos, “verificando que varios dos equipos foran vendidos a particulares“. Deste xeito, os axentes constataron que os presuntos autores “actuaron planificando con anterioridade e de maneira premeditada, desprazándose desde o seu domicilio en Lugo ata Vilalba para cometer os feitos delituosos”. A maiores, os axentes comprobaron durante a investigación que os autores formaban parte dun grupo “perfectamente organizado, con roles predefinidos e onde contaban cunha ampla rede de clientes para colocar o material informático subtraído, redundando nun cuantioso beneficio”.
Segundo destacou a Garda Civil, o valor dos efectos subtraídos alcanzaba os 15.000 euros. Con todo, a investigación finalizou coa detención de catro persoas e a imputación en calidade de investigados de dous menores de idade, todos eles residentes en Lugo, aos cales se lles imputan os delitos de Grupo criminal e roubo con forza. As dilixencias policiais foron remitidas ao Xulgado de Primeira Instancia e Instrución nº 1 de Vilalba e á Fiscalía de Menores de Lugo.
