Policías Nacionais adscritos á Comisaría Provincial de Lugo detiveron esta pasada noite a dous homes por un delito de roubo con forza en grao de tentativa. Trataron de acceder á catedral de Lugo para roubar.
Foi a chamada dun cidadán ao 091, a que puxo en alerta aos servizos policiais, posibilitando unha rápida actuación.
Personados no lugar, puideron deter in situ aos dous homes que estaban a forzar a fechadura para tratar de acceder ao interior da Catedral.
Tras unha requisa das súas pertenzas, atoparon diferentes ferramentas para a realización de roubos así como outros indicios da posible comisión de diferentes feitos delituosos.
Unha vez elaborado o correspondente atestado serán postos a disposición da Autoridade Xudicial xunto con todo o actuado.
