Unha persoa tivo que ser trasladada tras quedar inconsciente ao producirse unha fuga de gas dunha estufa na súa vivenda situada na rúa Irmáns Carro, en Lugo.

Segundo informou o 112 Galicia, a central de emerxencias tivo coñecemento dos feitos a través dos servizos sanitarios pouco despois das 15.30 horas.

Ao recibir a información, os operadores do 112 deron aviso aos Bombeiros de Lugo, á Policía Nacional e á Local, así como á Agrupación de Voluntarios de Protección Civil.

Unha vez no lugar, os bombeiros indicaron que había unha fuga que proviña dunha estufa de gas que se atopaba acendida. Tras apagala e ventilar a estancia, as medicións deron negativas.

Mentres, a persoa que se atopaba na vivenda inconsciente foi trasladada polo persoal sanitario ao centro hospitalario de referencia.