O Xulgado de Instrución número 2 de Mondoñedo puxo en liberdade, pero coa condición de investigado por un delito de malos tratos cara á súa parella, ao mozo detido o martes na Pastoriza por ameazar cunhas tesoiras á súa noiva.
Ademais, impúxoselle a prohibición de comunicarse ou aproximarse á vítima, tal e como confirman fontes do Tribunal Superior de Xustiza de Galicia (TSXG).
Os feitos ocorreron na parroquia de Vián na tarde do martes, segundo fontes do Instituto Armado. O mozo collera unhas tesoiras para ameazar á súa noiva e aos axentes que acudiron ao lugar.
De feito, os efectivos tiveron que realizar un “disparo intimidatorio”, ao aire, para tranquilizalo.
Cando lograron detelo, foi trasladado en primeiro lugar ao momento de atención continuada (PAC) de Meira e, despois, ao Hospital Universitario Lucus Augusti de Lugo, onde permaneceu ata que este xoves pasou a disposición xudicial.
