Catro persoas, dúas delas menores, resultaron feridas este domingo tras sufrir unha saída de vía o vehículo no que circulaban pola autovía A-6, ao seu paso polo municipio lucense de Begonte.
Ademais, un dos adultos tivo que ser excarcerado polos equipos de intervención, mentres que os outros tres ocupantes puideron saír polos seus propios medios. Segundo informou o 112 Galicia, o accidente produciuse ao fío das 15,45 horas, tal e como indicaron varias testemuñas que contactaron coa central de emerxencias para informar dunha saída de vía á altura do punto quilométrico 519 da A-6, ao seu paso pola parroquia de Castro, sentido A Coruña.
As persoas que se puxeron en contacto co 112 coincidían en afirmar que o condutor perdeu o control do vehículo e chocou contra a medianeira, o que provocou que o turismo finalizase ladeado.
Tamén efectivos de Protección Civil de Ferrol, que circulaban pola zona no momento dos feitos, informaron á central de emerxencias sobre a necesidade de contactar con equipos que dispuxesen de material de excarceración, xa que, a consecuencia do impacto, un dos adultos estaba atrapado.
