Axentes da Policía Local localizaron en Lugo a un menor, que segundo o mesmo recoñeceu, tirou pedras á terraza dun bar, impactando unha delas na cabeza dun home. Segundo recolle o parte de incidencias da Policía Local, os feitos producíronse na tarde do día 4. Unha patrulla acudiu ás inmediacións da igrexa do Sagrado Corazón tras denunciar un home que uns mozos lle lanzasen varias pedras, impactando unha delas na súa cabeza.
En concreto, precisou que eran catro os mozos, ademais de achegar a súa descrición física. Pouco despois, a Policía localizounos á saída dun supermercado da zona procedendo á súa identificación, sendo todos eles menores de idade. Un deles recoñeceu que foi o que lanzou as pedras á terraza.
ALCOL E ACCIDENTES
Noutra orde de cousas, a Policía Local tamén actuou na rúa Montefaro, confluencia coa avenida da Coruña, por un accidente no que estaban implicados tres vehículos, causado por un condutor que presentaba signos de estar bébedo. Dúas persoas presentaban, lesións que non revestían gravidade.
Ademais, efectuáronse controis de alcoholemia con sancións, nas inmediacións do paseo Fábrica da Luz, en Xosé Castiñeira, e na rúa Dinán. Neste caso detectouse a tres condutores con signos de ter bebido.
