Axentes da Policía Local de Lugo detectaron ata sete condutores ebrios e catro positivos en drogas, entre outras infraccións, nos operativos de seguridade cidadá desenvolvidos entre este xoves e a madrugada do venres. En concreto, os operativos identificaron condutores que circulaban consumindo alcol nas rúas Xosé Fernández, Rolda das Fontiñas, Avenida de Magoi, Rolda de Fingoi, Pintor Corredoira e Montero Ríos.
Ademais, na rúa Xosé Fernández e no Polígono do Ceao identificáronse dous condutores positivos en THC e anfetaminas. Así mesmo, na Avenida de Magoi e na rúa Lamas de Prado, os axentes deron o alto a dous condutores que deron positivo en cocaína. Os controis detectaron, ademais, outras infraccións, como nove vehículos coa ITV caducada e dous coa inspección desfavorable, tres coches sen seguro, un condutor que non facía uso de cinto e dous co permiso de conducir caducado. Tamén se deu o alto a dous condutores de patinetes eléctricos que circulaban por zona peonil.
