Os bombeiros de Vilalba traballan na extinción dun incendio nunha nave de explotación gandeira en Muras (Lugo). Segundo a información facilitada ao 112 Galicia polos particulares que contactaron coa central de emerxencias, o lume puido ser provocado por un raio, que afectou toda a instalación eléctrica da nave e tamén dunha vivenda que se atopaba nas proximidades.

O 112 Galicia tivo constancia dos feitos poucos minutos antes das 18,00 horas deste luns. De acordo co relato do alertante, o lume consumía rolos de herba seca e diversa maquinaria agrícola almacenada nunha explotación gandeira localizada na parroquia de Irixoa, no concello lucense de Muras.

O 112 deu aviso aos bombeiros de Vilalba e de Viveiro, aos membros do distrito forestal da zona, ao persoal do concello e ás autoridades ambientais da Xunta de Galicia. Unha vez no lugar, os efectivos do Servizo de Prevención Extinción de Incendios e Salvamento de Vilalba confirmaron que a estrutura da edificación colapsou por completo.

Agora, os bombeiros continúan no punto traballando para lograr a completa extinción do lume. O 112 tamén pasou aviso ao equipo de Urxencias Sanitarias, por se nalgún momento fose necesaria a súa intervención.