O Tribunal Superior de Xustiza de Galicia (TSXG) revogou a condena de oito anos e medio de cárcere imposto pola Audiencia Provincial de Lugo a un home por un delito de abuso sexual ao entender que a versión da suposta vítima incorría en contradicións.
Nun fallo emitido o pasado 29 de setembro e difundido este xoves, a Sala do Civil e Penal do Alto Tribunal galego estima o recurso do condenado, ao que absolve do delito de abuso sexual. Contra a resolución cabe recurso de casación ante o Tribunal Supremo.
A sala considera que os feitos, rexistrados ao longo do ano 2019, non están debidamente acreditados ao sosterse unicamente pola versión da denunciante, unha muller de 65 anos que ten recoñecida unha discapacidade do 65,5%.
“Existen contradicións entre as diversas declaracións prestadas pola denunciante, xa sexan relativas ao número e á natureza dos actos sexuais que lle foron impostos como á temporalización dos devanditos actos ou tamén ás circunstancias que os rodearían, así como imprecisións significativas”, subliña o tribunal na súa resolución.
Neste sentido, determinan que o testemuño achegado pola suposta agredida é “fluctuante e falto de corrección”, ao que se suma “a carencia de verdadeiros elementos de corroboración”, algo que, como recalca o tribunal, é “esencial” cando o caso se sustenta unicamente na versión da vítima.
Ademais, os maxistrados aseguran que para emitir a condena de primeira instancia non levou a cabo “unha análise de credibilidade da vítima”.
