O Tribunal Superior de Xustiza de Galicia informou de que se suspendeu a vista de apelación prevista para este luns do recurso contra a sentenza da Audiencia Provincial de Lugo que condenou, de acordo ao veredicto do tribunal do xurado, a prisión permanente revisable a Ana Sandamil polo asasinato da súa filla Desirée Leal de sete anos en maio de 2019.
Segundo trasladou o TSXG, a vista, prevista para as 11,00 horas, tivo que suspenderse “debido a unha situación sobrevinda para un maxistrado que forma parte do tribunal”.
O obxectivo desta vista é que o tribunal revise e examine os argumentos que no seu día se motivaron por parte da Audiencia Provincial de Lugo para esta condena máxima despois de que un xurado popular declarase culpable da morte da pequena en maio de 2019 a Ana Sandamil.
O xuízo polo asasinato de Desirée celebrouse nas primeiras semanas de febreiro deste ano, onde se constataba que a pequena morrera por asfixia o mesmo día que a tiña que recoller o seu pai dentro do réxime de visitas establecido con Sandamil.
