As tres acusacións; Fiscalía, acusación popular e particular piden 25 anos para o acusado do crime machista rexistrado no barrio das Gándaras, na cidade de Lugo, en febreiro de 2020. A acusación popular asegura que o acusado “cosificaba” á vítima, mentres que a defensa pide que se aplique a eximente de “alcol e drogadicción” e alega que o procesado e a asasinada non eran parella.
O xuízo que se celebra na Sección Segunda da Audiencia Provincial de Lugo comezou este luns coa designación do xurado popular e estenderase ata o mércores 6 de xullo. Os feitos xulgados remóntanse á noite do 6 e a madrugada do 7 de febreiro de 2020. A vítima, de 49 anos de idade, foi atopada morta na noite do venres 7 no piso no que residía soa na cidade de Lugo. O cadáver apareceu con feridas de arma branca no pescozo.
O presunto asasino foi detido o sábado 8 de febreiro de 2020 pola tarde na cidade de Lugo, como autor dos delitos de homicidio, violencia de xénero e violencia doméstica. Desde ese momento o home permanece en prisión provisional.
A defensa do presunto asasino de Clara Expósito, con dous fillos que quedan orfos, limitouse a avanzar, antes de comezar o xuízo, que vai pedir que se aplique a eximente de “alcol e drogadicción”, á vez que deslizaba que non eran parella.
Pola súa banda, a acusación popular que encarna a Fundación Amigos de Galicia, a través do avogado Francisco José Lago Calvo, anunciou que ía solicitar unha “modificación da responsabilidade civil que solicitamos para os dous fillos, que o incrementamos de cen a 200.000 euros”.
AGRAVANTE
Fronte a isto sitúa “o agravante de parentesco, en canto á relación afectiva que mantiña Clara María co seu agresor e o agravante de xénero porque o delito se produce polo feito de ser muller e o control que exercía sobre ela”. “A cosificaba”, describiu. Lago Calvo deixou claro que está “absolutamente acreditado” que era parella fronte ao que mantén a defensa do acusado.
A acusación particular que exerce Fernanda López puntualizou, antes de entrar en sala, que vai “tentar demostrar que se trata dun asasinato coa concorrencia da aleivosía, é dicir que a vítima non tivo ningunha posibilidade de defenderse, e demostrarase tamén que había unha convivencia e que había unha parella estable”. Estas acusacións, tanto particular como popular, únense á petición da acusación pública, da Fiscalía de Lugo, de impor ao presunto autor deste crime machista 25 anos de prisión
