Axentes da Policía Nacional adscritos á Comisaría Provincial de Lugo, encargados da investigación dos delitos relacionados coas persoas, detiveron a un menor de idade por un delito de lesións graves por agredir a un mozo en decembro, ao que rompeu o óso orbital esquerdo.
Segundo informou a Policía Nacional, os feitos ocorreron o pasado 29 de decembro na zona de lecer da Catedral, cando dous mozos que se atopaban no exterior dun dos locais foron abordados por un home, o menor agora detido.
A Policía relatou que o menor, sen mediar palabra, agrediu á vítima, á que propinou tres puñadas na cara, sen que chegase a caer a chan, pero o mozo quedou aparvado.
Como consecuencia desta agresión o mozo agredido tivo que ser asistido no Hospital Universitario Lucus Augusti de Lugo (HULA), nun primeiro momento, para a cura das feridas causadas, pero posteriormente derivou nun tratamento pormenorizado, xa que presenta a rotura do óso orbital esquerdo.
Cos datos achegados pola vítima e a testemuña, os investigadores realizaron as correspondentes dilixencias, no marco das cales identificaron este pasado xoves 20 de xaneiro ao agresor e ao seu acompañante.
Por iso, dirixíronse ao seu domicilio no barrio de Paradai, onde, unha vez localizado foi detido e trasladado a dependencias da Policía Nacional. En presenza do seu avogado e proxenitora en comisaría foi explorado, segundo estipula a lei do menor, matizan as mesmas fontes.
Posteriormente, o mozo arrestado quedou liberdade a cargo dos seus pais e trasladáronse os feitos á Fiscalía de Menores. A Policía Nacional destaca que “non existía ningún tipo de relación entre vítima e agresor”.
