Axentes da Policía Nacional adscritos á Comisaría Provincial de Lugo encargados da investigación dos delitos relacionados coa saúde pública desarticularon un punto de venda de droga na Rúa Alexandre Bóveda, a escaso metros dun centro educativo onde se puido comprobar que se vendía droga a menores de idade. O operativo saldouse cunha parella e o seu fillo detidos.

Segundo informou a Policía Nacional, nese operativo detívose a tres membros dunha mesma familia, dous homes e unha muller de nacionalidade española con idades comprendidas entre os 42 e os 19 anos.

As investigacións comezaron a principios do ano 2020 debido á “crecente alarma social que xeraría a presenza dos detidos nun domicilio da zona onde era continua a afluencia de persoas con aspecto de toxicómanos”, indica a Policía, que “tras acudir brevemente ao domicilio para adquirir a droga permanecían en grupos polos arredores, incrementando mais se cabe a sensación de inseguridade entre os veciños e empresarios da zona”.

As mesmas fontes policiais sinalaron que en distintos momentos chegáronse a producir unha serie de liortas na zona nas que estaban implicados os investigados.

As pescudas realizadas polos axentes comprobaron como a trasfega de persoas que acudían ao domicilio dos detidos “era continuo e constante”, destaca a Policía, ao longo de distintas horas do día, polo que iniciaron un proceso de investigación que lles levou a recompilar distintos indicios acerca de que en dita vivenda vendíanse sustancias estupefacientes. Moitos dos seus clientes eran mozos menores de idade que acudían ao lugar a adquirir as súas doses de droga.

Tamén chamou a atención dos investigadores, o feito de que durante o período mais estrito de confinamento domiciliario derivado da crise sanitaria, a trasfega de persoas que acudían a comprar droga a este domicilio non se reduciu en ningún momento, aínda que ao contrario a afluencia de consumidores á vivenda dos detidos aumentou.

CINCO ORDES

Durante a investigación a Policía puido constatar tamén que no interior da vivenda se ocultana un membro do clan familiar, sobre o que pesaban cinco ordes de procura e captura, por distintos xulgados de toda Galicia e de Asturias, entre elas unha para o ingreso en prisión desta persoa.

Tras varios meses de investigacións e solicitar os indicios suficientes, os axentes, coordinados polo Xulgado de Instrución número 1 de Lugo, efectuaron unha entrada e rexistro da vivenda onde residían os implicados e comprobaron que un deles era o home que buscado polos xulgados de distintos puntos da xeografía galega e asturiana.

Así mesmo, foron arrestados a esposa e o fillo deste unha vez que no domicilio foron atopadas distintas cantidades de haxix distribuída en bolsitas individuais, preparadas para a súa venda, así como diñeiro fraccionado e distintos útiles para a pesada e o empaquetado da droga.

No rexistro interviñéronse armas brancas de grandes dimensións, “o que dá idea do carácter conflitivo dos detidos na operación policial”, subliña a Policía.

FUXIDA

En canto ao home sobre o que pesaban as reclamacións, unha vez en dependencias policiais, imputóuselle ser o responsable dunha perigosa fuxida en vehículo que protagonizara días antes tras ser interceptado na estación de autobuses ao ver a presenza policial.

Ao darlle o alto, dirixiuse a un vehículo estacionado no exterior, meteu medio corpo no mesmo, a través do portelo, e fuxiu do lugar. No seu percorrido impactou contra o turismo dun particular que, ao ver a escena, tratou de interceptarlles o paso.

Os detidos, unha vez finalizadas as dilixencias, foron postos a disposición do Xulgado de Instrución número 1 de Lugo, o cal acordou o ingreso en prisión dun dos detidos.