Efectivos coordinados pola Garda Civil proseguen este martes por terra e aire a procura do veciño de Navia de Suarna que permanece desaparecido desde o venres pasado. Segundo informaron a Europa Press fontes do Instituto Armado, desde primeira hora deste martes continúan os labores de rastrexo por “zonas concéntricas” do lugar de desaparición deste home.
As mesmas fontes indicaron que o helicóptero que tivo que aterrar de emerxencia este luns no marco do dispositivo sumarase de novo aos labores “cando estea dispoñible”, polo que contan con drones para a procura aérea.
De feito este luns o Grupo de Apoio Loxístico (GALI) da Axencia Galega de Emerxencias (Axega) colaborou no operativo despregado para localizar ao home de 53 anos de idade que desapareceu da súa casa no lugar de Ventosa, en Navia de Suarna, o pasado venres.
Co emprego de drones, os membros do GALI peitearon este luns unha zona próxima á vivenda, na parroquia de Moia, na procura dalgunha pista para dar co desaparecido. Polo momento, subliñou a Garda Civil, “todas as hipóteses están abertas“.
O 112 Galicia tivo coñecemento da desaparición do home durante a noite do sábado, a través de varios dos seus familiares e, a partir de aí, activouse un operativo, coordinado pola Garda Civil, no que colaboran efectivos do GES de Becerreá, membros da Agrupación de Voluntarios de Protección Civil de Cervantes e a Unidade de Drones da Axega.
O desaparecido, de 53 anos, vive só na aldea de Ventosa e foi un veciño de alertou o sábado pola tarde de que non o vía desde facía un día, e que ademais tiña o coche no garaxe á beira de casa. O home chamábao e non contestaba e a vivenda estaba pechada. O home desaparecido non ten irmáns e conta con familiares en segundo grao. Hai testemuños que aseguran que foi visto no municipio o venres ao mediodía.
