Os ladróns que o pasado sábado atracaron un caixeiro automático de Caixa Rural no municipio lucense da Pastoriza, que rebentaron cunha explosión, fixéronse cun botín de 30.000 euros, segundo cifrou o rexedor, Primitivo Igrexas.
O alcalde admitiu que no concello seguen “sobresaltados” e “moi sorprendidos” polo ocorrido, á vez que chamou a atención polo feito de que o caixeiro se rebentase “nun lugar tan céntrico e á beira do centro de saúde“. “Sorprendeunos a todos os veciños, porque isto é algo que non se espera”, confesou.
Primitivo Iglesias calcula que levaron “ao redor dos 30.000 euros”, á vez que puntualiza que “non” se produciron danos en infraestruturas do concello, pero si que “son cuantiosos” os danos ocasionados na oficina bancaria.
O consistorio, engadiu, vai dar “facilidades” para que se acometan as obras de restauración da sucursal de Caixa Rural. “Desde o concello avisóuselles de que poden ir empezando cando queiran, aínda que despois presenten os papeis regulamentarios, pero isto é unha cousa de urxencia e pómonos á súa disposición para que se solucionen estes defectos estruturais, dado que tamén temos unha parede que pode caer á rúa”, subliñou. En canto aos danos, Primitivo Iglesias deixa caer que “haberá que esperar a que se empece cos labores de rebo”, que se iniciarán ao longo deste luns.
