EFE | Axentes da Policía Local de Lugo tiveron que intervir durante a fin de semana en oito domicilios, como consecuencia de queixas veciñais por mor dos ruídos procedentes de reunións ou festas privadas.
A primeira intervención dos axentes produciuse ás 22:15 horas, como consecuencia dunha reunión de catro persoas nun piso en Estrada da Granxa, e a última ás 04:55 horas, nun domicilio en Curros Enríquez, onde a Policía Local tivo que ir ata en dúas ocasións -a primeira ás 02:15 horas- por mor dun grupo de xente falaba en voz alta e tiña música posta cun volume demasiado elevado.
Tamén interviñeron por voces e música nun ton demasiado elevado en domicilios de San Roque e Músico de Falla. Na rúa Mariña Española, o inquilino dun piso do que saían “ruídos molestos” para os demais veciños, confesoulles aos axentes que estaba a celebrar unha festa con outros tres amigos.
Durante a pasada madrugada -do 24 ao 25 de xaneiro-, a Policía Local tivo que intervir en domicilios da Rolda do Carme e a Avenida da Coruña, ás 1:50 e ás 04:50 horas, como consecuencia de ruídos molestos para os demais veciños. En todos os casos, os axentes levantaron acta de denuncia por infraccións da Ordenanza de Protección Ambiental.
