Os servizos de xestión territorial da Deputación de Lugo traballan en despexar a estrada LU-P-1910, á altura do lugar de Naraxa, na Fonsagrada, debido a un desprendemento de pedras que irrompeu na vía.
Diso informou a institución provincial, que sinala que mantén cortada a estrada, que une este concello da Montaña con Asturias, e que espera que esta semana se poida restablecer de novo ao tráfico, sempre que as condicións meteorolóxicas sexan favorables.
Ata o lugar desprazouse maquinaria pesada –unha pa e un camión, para proceder á retirada das pedras que caeron na vía.
A Deputación habilitou desvíos alternativos e a sinalización correspondente para garantir a seguridade dos usuarios desta vía provincial e causar o menor prexuízo posible.
