EFE | Axentes da Policía Local de Lugo identificaron e propuxeron para sanción esta fin de semana un total de 18 persoas que participaban en dúas festas na Avenida de Madrid e na rúa San Roque. Amais de non respectar o límite de reunión de persoas, tamén incumprían o toque de queda.
Na festa dun piso da Avenida de Madrid, foron denunciadas oito persoas non conviventes a iso das 01:30 horas. Unha hora máis tarde, outras dez persoas foron sancionadas por motivos similares ao ter montada unha festa nun baixo de San Roque, onde instalaran un equipo de música con altofalantes e unha mesa para bebidas.
Os axentes acudiron a eses lugares precisamente polas queixas dos veciños da zona, como consecuencia do ruído que viña do interior do piso e do baixo. Os denunciados enfróntanse agora a multas que van desde os 601 ata os 30.000 euros.
OUTRAS SANCIÓNS
A Policía Local tamén tivo que desprazarse a domicilios na Ronda das Fontiñas, Mariña Española e Lamas de Prado, onde veciños avisaran de ruídos molestos de madrugada por mor de reunións ou festas familiares, pero de persoas conviventes.
Tamén foron denunciadas outras cinco persoas por entrar ou saír do municipio de Lugo, que continúa pechado perimetralmente por orde das autoridades sanitarias, sen a xustificación necesaria para iso.
