A Garda Civil imputou en calidade de investigada unha veciña de Lugo de 49 anos de idade por un delito contra a seguridade viaria tras ser interceptada durante o toque de queda cando conducía un turismo que carecía de seguro obrigatorio, levaba a ITV caducada e co permiso de condución retirado pola perda dos puntos.
Segundo informou o Instituto Armado, a muller foi cachada na madrugada do pasado sábado nun control establecido na N-540, en Guntín. No momento da identificación, a condutora non puido xustificar “ningunha das autorizacións previstas para desprazarse no tramo horario entre as 23:00 ae as 6:00 horas”.
A persoa investigada conducía un turismo que carecía de seguro obrigatorio e ITV en vigor. Ademais, a condutora tiña retirado o permiso de conducir pola perda de todos os puntos asignados. A muller foi sometida ao test de detección de sustancias estupefacientes, no que obtivo resultado positivo.
A persoa investigada en relación con estes feitos foi posta a disposición xudicial.
