A Policía Local de Lugo interveu nunha festa nun domicilio, tras unha denuncia por ruído, na que había 18 persoas non convivientes a pesar de estar limitadas as reunións a 10 persoas nesa área sanitaria.
Así o informou a Policía Local de Lugo, que explicou que sobre as 21,20 horas do 30 de setembro unha patrulla da Unidade Territorial de Policía de Barrio acudiu a unha vivenda da rúa Miño onde, segundo denunciaron veciños, había unha festa “que ocasionaba moitas molestias”.
Os axentes comprobaron que se escoitaban voces e cánticos “en todo alto”, indicaron as mesmas fontes, polo que se procedeu á identificación da responsable da vivenda. Segundo manifestaron, celebraban unha festa de aniversario, con 12 adultos e dous nenos, “todos sen máscara de protección e moitos deles non convivientes”.
Por iso, tramitaron acta denuncia por infracción á Lei de Saúde de Galicia, xa que a vixente normativa, subliña a Policía Local, para o municipio de Lugo “limita os grupos de persoas para o desenvolvemento de calquera actividade ou evento de carácter familiar ou social na vía pública, espazos de uso público ou espazos privados, a un máximo de dez persoas, excepto no caso de persoas convivientes”.