A Garda Civil auxiliou o pasado domingo a un octoxenario que camiñaba desorientado e perdido pola beira da N-VI, á altura do concello de Outeiro de Rei, mentres intentaba regresar á súa casa.

Ocorreu o día 10 de maio, algo antes das once da noite. Unha patrulla que prestaba servizo nesta estrada observou un peón na beiravía. Debido á hora e á avanzada idade do camiñante, que resultou ter 80 anos, os axentes detiveron a súa marcha para falaren con el. O home manifestou que se estaba dirixindo á súa casa, pero dende un primeiro momento deu mostras de incongruencia nas súas respostas, así como indicios de desorientación. 

Portaba un teléfono móbil no que recibía constantes chamadas, que el cortaba sen contestar ao alegar que xa estaba preto da súa casa. A preguntas dos axentes, explicou que o seu domicilio estaba a cen metros daquel lugar e mesmo facilitou o nome dunha rúa. Este feito acrecentou as sospeitas da Garda Civil, xa que se atopaban nunha zona rural sen construcións próximas.

Finalmente, os axentes conseguiron falar por teléfono coa filla do octoxenario, persoa que o chamaba insistentemente ao teléfono. Levaba dende as 20:00 horas da tarde tentando localizalo, preocupada porque o ancián non regresara á casa logo de pasear. Ante a negativa do señor para ser acompañado polos axentes ata a súa casa, acordaron que sería a filla quen fose buscalo. Finalmente, esta fíxose cargo do coidado do pai e trasladouno ata o domilio onde ambos conviven, sito na localidade de Lugo.