EFE | Axentes da Policía Local de Lugo auxiliaron un home que se atopaba medio espido e sen poder poñerse de pé nun horto adxacente á rúa Pena Loura durante a tardiña do pasado sábado.
Foron os veciños quen alertaron a través do teléfono 092 de que “un home semiespido pedía axuda a berros” dende un horto próximo. Inmediatamente, unha patrulla da Policía Local desprazouse ao lugar indicado e os axentes comprobaron que, efectivamente, un home estaba tirado contra o muro do horto, coa “mirada fixa pero sen poder falar ou expresarse”, dado que só emitía “berros e queixumes”.
Á vez que solicitaron o desprazamento dunha ambulancia, os axentes tapárono e déronlle calor, ademais de tranquilizalo, co que conseguiron que o home se fose recuperando aos poucos. Tamén lle axudaron a poñer a roupa que tiña nun alpendre contiguo. Cando chegou a ambulancia, o home xa puido subir ao vehículo sanitario polo seu propio pé, aínda que foi trasladado ao HULA para recibir atención médica.
Posteriormente, os axentes puideron comprobar que o home ao que axudaran, de 64 anos de idade, é diabético e sofre bruscas baixadas de azucre, algo que puido suceder cando se atopaba no horto, dado que foi ao lugar para atender animais da súa propiedade.
