Redacción e EP.- A escola infantil Gregorio Sanz, situada na Avenida de Vila Verde, manterá suspendida a súa actividade este mércores 3 de xullo por mor do incendio que afectou unha vivenda próxima.
Así o informou o goberno local da cidade logo de que o tenente de alcalde, Rubén Arroxo, e o edil responsable de educación, Felipe Rivas, acudiran pola mañá ás instalacións da gardaría. As chamas que destruíron unha vivenda unifamiliar situada a poucos metros do edificio non alcanzaron o inmoble pero, aínda así, decidiuse suspender a actividade na escola municipal durante o día de hoxe, mércores.
Felipe Rivas informou de que mañá mesmo xa se recuperará a normalidade na gardaría e as instalacións volverán abrir segundo o previsto.