A Garda Civil identificou en Becerreá un veciño do municipio lucense de Folgoso do Courel como presunto autor da venda de boletos de lotaría falsos.
Segundo informou o Instituto Armado, o pasado día 28 deron cunha persoa que tiña no seu poder máis de 350 boletos de lotaría que “presentaban un gran parecido aos lexítimos”. Ao parecer, o home aproveitaba como ‘gancho’ a súa ” presunta pertenza a unha asociación de discapacitados”.
Así, din as mesmas fontes, estes boletos eran vendidos por un importe de un e dous euros. Porén, pola parte posterior do papel, as instruccións “non indicaban como se podía obter o premio en caso de gañar, polo que o cliente final nunca chegaría a obter ningunha compensación económica” aínda que acertara a combinación gañadora, destacan. Neste suposto ilícito, o individuo valeríase doutras persoas “que lle facilitarían a impresión dos boletos para a súa posta en circulación en zonas e actos de gran afluencia de xente en localidades da provincia de Lugo”, destaca a Benemérita.
Este dispositivo policial “completa o establecido anteriormente o pasado mes de maio”, no cal se deu conta á autoridade xudicial de Becerreá de supostos “delitos de usurpación de identidade e delito continuado de estafa no seo dunha organización criminal”.
Así pois, a Garda Civil explica que desarticulou este punto de venda de lotaría e rematou co negocio fraudulento do identificado, que “chegaba a obter máis de 300 euros ao día coa distribución destes boletos”. Segundo aseguraron as mesmas fontes, este feito causaba “alarma social na poboación”, xa que intentaban cobrar os boletos premiados “crendo que eran lexítimos”, pero non conseguían ningunha recompensa económica.
