Estudantes denunciaron a presenza de vermes na comida servida no comedor dunha residencia universitaria privada do campus de Lugo. Así o confirmou o reitor da USC, Antonio López, en declaracións a Europa Press. Matizou ademais que non é nin un comedor nin unha residencia xestionada pola universidade, aínda que lles preocupa “na medida que pode afectar os estudantes”.
O reitor espera que os responsables actúen para que os estudantes “poidan ter o mellor servizo”. Neste sentido, a Consellería de Sanidade confirmou a Europa Press que, recibida a denuncia, os servizos veterinarios de inspección da Dirección Xeral de Saúde Pública acudiron ao centro para proceder coa súa análise.
A inspección das condicións hixiénicas e operacións obtiveron un resultado correcto, do mesmo xeito que as condicións de almacenamento das materias primas. Confirman que tampouco se observaron signos de presenza de pragas. Con todo, destacan que a empresa deberá presentar as medidas que prevé adoptar para investigar as posibles causas da presenza da larva no alimento.
