O Concello de Lugo ordenou a suspensión inmediata das obras que se executan no inmoble situado na rúa Doutor García Portela, 17, onde se pretendía habilitar un aloxamento para menores, ao comprobar que se están realizando “sen o preceptivo título habilitante urbanístico municipal”. Segundo explican nun comunicado, a resolución municipal establece tamén a incoación dun expediente de reposición da legalidade urbanística e solicita a anotación preventiva no Rexistro da Propiedade, de acordo co previsto na normativa vixente.

Así, os interesados disporán dun prazo de 15 días hábiles para presentar alegacións e documentación complementaria, e poderán interpor os recursos correspondentes. Apuntan que, a través dos servizos municipais, traballarán da man do equipo técnico para que, unha vez emendadas as deficiencias documentais, poida axilizarse a tramitación da licenza urbanística correspondente, “coa máxima dilixencia e transparencia”. Por último, desde o Concello animan a “respectar” os procedementos legais e técnicos para “garantir a seguridade das actuacións e o cumprimento da normativa urbanística, especialmente tratándose dun equipamento sensible como é un centro de atención a menores”.

15 MENORES MIGRANTES A LUGO

A finais de outubro coñecíase que a cidade de Lugo acollerá a un grupo de 15 menores migrantes da cota de Canarias que o Goberno central debe distribuír entre comunidades por mandato do Tribunal Supremo. O Goberno informaba de que prevía trasladar esta semana desde Canarias á Península a un total de 27 menores migrantes non acompañados solicitantes de asilo.

Estas derivacións, que se farán en tres grupos diferenciados, prodúcense como resposta ao auto do Tribunal Supremo, que en marzo pediu ao Executivo que se fixese cargo cos seus medios duns 1.000 nenos menores migrantes non acompañados que solicitaran asilo. Estes 15 súmanse aos 317 menores que deben ir chegando a Galicia segundo o acordado no Consello de Ministros a finais de agosto.