Un home de 24 anos foi detido en Lugo por participar nunha suposta agresión sexual cometida contra unha menor de 16 anos durante Noitevella. Segundo informou a Policía Local de Lugo, a vítima denunciou que cando saía dun local de lecer nocturno ao redor das 03.00 horas da madrugada de Fin de Ano foi abordada e rodeada por un grupo de homes.
Dous dos membros do grupo comezaron a realizar tocamentos á menor, que quedou paralizada ata que puido chamar ao seu noivo, quen, momentos máis tarde, relatou o sucedido a unha patrulla da Policía Local que se atopaba na Rolda da Muralla. Un dos presuntos agresores, un home de 24 anos, foi interceptado na Rúa Santiago e detido para ser traslasdado a dependencias policiais.
VIOLENCIA DE XÉNERO
Tres horas despois, outro home foi arrestado na rúa Mariña Española pola Policía Local por agredir á súa exparella, que decidiu non presentar denuncia. Unha testemuña relatou aos axentes que o home, que no momento no que chegou a patrulla se atopaba suxeitando a outro home, agarráraa, zarandeáraa e empuxáraa contra un portal.
Doutra banda, ás 12.00 horas do mércores 1 de xaneiro, outro home foi detido por un delito de violencia de xénero cometido contra a súa muller nun domicilio da praza Viana do Castelo. Os axentes personáronse na vivenda despois de recibir unha alerta. Unha vez alí, a filla do matrimonio, de 12 anos, relatou aos policías que o seu pai zarandeara á súa nai, algo que ocorría con frecuencia. A vítima confirmou a versión da súa filla e contou aos axentes que, un ano antes, o seu marido agredíralle na vía pública causándolle unha ferida nun ollo, aínda que non o denunciou. O home foi arrestado e trasladado a dependencias policiais, mentres que a vítima e a súa filla foron evacuadas a un centro hospitalario para que recibisen atención médica.
