A Audiencia de Lugo xulgará este martes a tres gandeiros de Guntín que obrigaban a dous empregados a traballar 13 horas ao día, sen contrato, sen descanso semanal nin vacacións e sen alta na Seguridade Social.

Segundo o escrito de Fiscalía, un dos traballadores comezou na explotación o día 12 de outubro de 2018, de forma irregular. Polos labores percibía un soldo de 700 euros mensuais, dos que lle descontaban 50 euros polo aloxamento que lle ofrecían nun anexo da explotación. O outro empregado, en idénticas condicións laborais, comezou a traballar o 1 de marzo de 2020 e compartía aloxamento co seu outro compañeiro.

O Ministerio Público sinala que ambos os traballadores asumiron ese calendario laboral contrario á normativa debido á súa situación, xa que eran migrantes, en situación irregular, desconocedores do idioma e sen recursos económicos. Ambos os traballadores prestaron servizo en ata agosto de 2020 cando se marcharon a unha casa de acollida.

Por iso, aos tres gandeiros impútaselles un delito contra os dereitos dos traballadores polo que Fiscalía solicita a pena de tres anos de prisión para cada un deles. Os acusados tamén deberán de indemnizar de maneira conxunta a un dos empregados con 13.240 euros polos salarios e pagas extras impagadas e 6.000 euros adicionais por danos morais. Para o outro traballador, Fiscalía pide unhas indemnizacións de 2.042 euros polos conceptos salariais e 1.300 euros polo prexuízo moral sufrido.