A subdelegada do Goberno en Lugo, Isabel Rodríguez, anunciou que as unidades de Información, Rexistro e Estranxeiría pasarán a ser puntos violeta, ampliando a rede de espazos públicos de asesoramento, atención e protección a posibles vítimas de violencia de xénero.

Esta iniciativa, explicou a Subdelegación nun comunicado, arrincou coa posta en marcha destes puntos nas oficinas do SEPE na provincia e agora nos edificios da Subdelegación do Goberno en Lugo.

O obxectivo é ampliar a rede de protección e seguridade desde as administracións públicas para as mulleres que o necesiten. Para iso, o persoal recibiu unha formación para a mellor prestación deste servizo.

Isabel Rodríguez destacou que a inauguración destes espazos responde a un proceso de mellora progresiva incorporando aos entes públicos, lugares de fácil acceso para a cidadanía. Ademais, servirá para facilitar información e materiais sobre como actuar ante un caso de violencia machista a establecementos, entidades, empresas e organismos públicos.