A concelleira de Turismo de Lugo, Maite Ferreiro, presentou este martes os datos rexistrados nas distintas instalacións turísticas durante os meses de xuño, xullo e agosto, cunha marca total de 77.155 persoas.
Segundo explican nun comunicado, os principais puntos de información turística da cidade, a Oficina Municipal de Turismo e o punto de información turística da Praza Maior atenderon durante todo o verán a 45.198 persoas, das que 21.016 foron a Lugo en agosto.
“Só no mes de agosto estes dous puntos rexistraron un número similar a todo o verán de 2019, cando a marca foi de 21.644 turistas no tres meses de campaña de verán”, explicou a concelleira. No que respecta ás salas museísticas municipais, este verán achegáronse 31.957 persoas, superando a marca de 28.835 do ano pasado.
Ferreiro destacou que o aumento de persoas que se achegaron á cidade responde á campaña Lugo Km 100, que está a situar ao concello “como un referente do turismo de calidade e proximidade, pondo en valor o patrimonio histórico e a amploa programación” da que se dispón.
Entre os visitantes que se achegaron ás distintas instalacións turísticas, destacan os procedentes do resto de Galicia, ademais de Madrid e Cataluña, seguidos de Valencia, País Vasco e Andalucía. Francia, Portugal, Reino Unido e Alemaña son os países con máis turistas estranxeiros rexistrados nas estatísticas municipais.
CIRCUÍTO GALEGO DE TEATRO AMADOR 2024
Por outra banda, Maite Ferreiro presentou, xunto aos integrantes do grupo Achádego Teatro, a nova edición do Ciclo Galego de Teatro Amador, organizado pola Federación Galega de Teatro Afeccionado en colaboración coa área de Cultura do Concello e coa Consellería de Cultura.
A edición 2024 deste ciclo contará con catro representacións teatrais para todos os públicos, representadas por catro compañías diferentes de toda Galicia, que levarán a cabo entre o 7 e o 22 de setembro no auditorio municipal Gustavo Freire.
Todas as representacións están destinadas a públicos de todas as idades. A entrada é gratuíta, pero é necesario retirala a través do portal entradaslugo.es.
