O octoxenario desaparecido o pasado día 5 en Pol foi encontrado en estado consciente este xoves no monte. Foi localizado por uns familiares nunha zona de monte.
Os membros de Protección Civil de Pol solicitaron a colaboración dos servizos sanitarios para a valoración do implicado, que estaba desorientado pero consciente, segundo confirmaron fontes do 112 e da Garda Civil de Lugo.
Neste operativo, coordinado polos axentes da Garda Civil, participaron Urxencias Sanitarias de Galicia-061 e as Agrupacións de Voluntarios de Protección Civil de Pol, Meira, A Pontenova, Riotorto, Lugo, Ribeira de Piquín e Baleira.
Convén sinalar, que o Grupo de Apoio Loxístico da Axencia Galega de Emerxencias (AXEGA) tamén colaborou nas tarefas de procura coa Unidade Operativa de Drones.
CONTINÚA A DE ABADÍN
Doutra banda, continúa a procura do octoxenario desaparecido en Abadín o pasado día 3, tamén nun dispositivo coordinado pola Garda Civil de Lugo.
O 112 Galicia recibiu a alerta de que este home faltaba do seu domicilio entre o domingo e o luns.
No operativo participan Urxencias Sanitarias de Galicia-061, a Garda Civil, a Asociación de Cans de Salvamento de Galicia e os membros de Protección Civil de Mondoñedo e Vilalba. Tamén tomou parte a Unidade Operativa de Drones do Grupo de Apoio Loxístico da AXEGA.
