O ex alcalde de Muras, Isaam Algnam Azzam, protestou este luns, na véspera de que volva sentar no banco dos acusados como presunto autor dun delito de prevaricación, porque, segundo el, se lle quere xulgar “por empregar xente”.
Este martes será xulgado na Sección Segunda da Audiencia Provincial de Lugo por unha ducia de contratos temporais entre 2012 e 2015 que, segundo Fiscalía, realizáronse sen seguir os procedementos regulados para a selección de persoal.
O Ministerio Fiscal considérao autor dun delito continuado de prevaricación e pide que sexa inhabilitado para emprego ou cargo público durante 15 anos. “Despois de 33 xuízos e todos absolto, quédame este xuízo por empregar xente”, censurou.
Isaam Algnam Azzam defendeu que fixo “un sistema de fixación de poboación”. “Agora falan da España baleira e eu empecei co da España baleira no ano 91, empecei dando premios á natalidade, ao casamento e a empregar a todo o mundo”, argumentou.
“E agora vanme xulgar por empregar xente. Isto non pasou en ningún sitio do mundo, con tantas cousas que hai hoxe en día”, soltou o ex rexedor murense”, agregou.
DI QUE ESTÁ “TRANQUILO”
Dito isto indicou que, ante o xuízo, dixo estar “tranquilo” e atribuíu que “todas esas denuncias son de odio e racismo”.
“Este señor está a gastar diñeiro do concello para darllo a avogados”, dixo en alusión ao actual alcalde Manuel Requeijo, do que di que “non” sabe se é alcalde ou “un axente do Bloque” (BNG).
“Eu nacín para axudar aos demais, tanto como médico ou alcalde. Non creo que me castiguen porque creo na xustiza”, remarcou, finalmente, Isaam Algnam.
O ex alcalde de Muras xa foi condenado por inxurias ao seu sucesor, Manuel Requeijo, en 2016, e foi xulgado en 2021 por prevaricación, nesa ocasión por asinar resolucións en materia urbanística que, supostamente, beneficiaban á súa muller, aínda que foi absolto pola Audiencia de Lugo.
