A Policía Local de Lugo propuxo para sanción ao responsable dun establecemento de lecer nocturno por organizar e celebrar un espectáculo erótico sen autorización, entre outras irregularidades.
Segundo informaron fontes municipais, os axentes tiveron coñecemento do ocorrido a través das redes sociais e localizouse o establecemento, na rúa Galicia. Unha vez visionados os vídeos colgados en redes sociais, unha dotación policial realizou unha inspección do local.
Así, a Policía identificou o responsable e abriu expediente sancionador por infracción grave da Lei de Emprendemento e da Competitividade económica de Galicia, por realizar un espectáculo sen autorización (proponse sanción de ata 30.050,61 euros e pode levar aparellada a suspensión de actividade por un ano).
Tamén se tramitou denuncia por infracción da Lei de Saúde de Galicia, por incumprir a obriga do uso de máscaras no interior do local, xa que a Policía comprobou que os camareiros e varios clientes non a usaban; así, como por outra infracción ao permitir o uso de cachimbas no establecemento.
