Galicia mantén á baixa a súa cifra de novos contaxios diarios de Covid, que xa están por baixo dos 3.000 e, aínda que o total de enfermos volveu a reducirse, a presión hospitalaria creceu novamente, con 46 ingresados máis, 2 en Unidades de Coidados Intensivos e 44 en camas convencionais.
Segundo os datos publicados este luns pola Consellería de Sanidade, con información recollida ata as 18,00 horas do domingo, hai 53.706 enfermos de Covid en Galicia, 3.861 menos que o día anterior ( e 9.161 menos que hai unha semana). Nas últimas horas, rexistráronse 2.738 novos contaxios. Todas as áreas sanitarias notificaron menos contaxios novos que a xornada anterior, agás a de Lugo que rexistrou 325 novos contaxios e queda con 5.573 persoas con Covid.
VOLVE A SUBIR A PRESIÓN HOSPITALARIA
Segundo informou este luns o Sergas, hai un total de 48 persoas con Covid en coidados críticos e 689 pacientes en planta. Por áreas, o maior número de enfermos graves están na da Coruña, con 14 ingresados (sen cambios na ocupación), seguida pola área de Lugo, con 9 pacientes en UCI (dous máis). Con respecto aos enfermos en unidades convecionais de hospitalización, aumentaron en todas as áreas. Lugo ten 72 (+12).
