A cidade de Lugo xa está preparada para o pistoletazo de arranque do ‘Arde Lucus’, a festa de recreación do pasado castrexo e romano da cidade de Lugo.

A menos de tres días do inicio da festividade, a alcaldesa de Lugo, Lara Méndez, destacou que as rúas e as prazas do municipio “xa están tinguidas de historia, de recreación, de luz e de cor”.

Méndez puxo o acento na “necesidade” do Arde Lucus en clave “de saúde”. “En concreto no que respecta á parte anímica que é igualmente moi importante ver como imos recuperando a normalidade, ver como queremos conciliar a desescalada coa recuperación de espazos”.

Así mesmo, estas actividades “axudan e contribúen á dinamización económica de Lugo, do sector da hostalaría, do comercio”, polo que “é moi necesario seguir activando estas iniciativas, sempre desde a cautela e da prevención, porque a pandemia segue estando aí”.

“Vese como se segue incrementando nalgún número os afectados, por tanto debemos de ser cautos, precavidos, pero debemos tamén de conciliar a recuperación da normalidade cando é a directriz que marca a Xunta de Galicia na desescalada e nós temos que seguir crecendo en recuperar as rúas para o lecer e tamén para a reactivación económica”, resaltou.