O responsable de Promoción Económica da Deputación de Lugo, Pablo Rivera, anunciou, tras a Xunta de Goberno provincial, a aprobación de “a adxudicación do servizo de prestacións básicas do centro de maiores de Pedrafita do Cebreiro“, paso previo para a súa inminente apertura.

Así, segundo explicou, “este xa é o último paso, o definitivo, que vai permitir abrir ese centro“. O contrato, destacou, “inclúe os servizos de cociña, de limpeza e de asistencia”. “O adxudicatario e o que vai levar a cabo a posta en marcha destes servizos será a Fundación Camiño Social, terá unha duración dun ano e o importe ascende a 651.000 euros”, debullou.

Rivera lembrou que “a principios do mes de marzo” finalizouse o equipamento desta residencia, un centro que contará con 30 prazas de residente e 20 de centro de día. A previsión é que “ao longo desta primavera, nun período curto de tempo, esa residencia vai estar en marcha”.

“Seguimos ese modelo de xestión, xa recoñecido fóra da provincia, como un modelo facía o que teñen que ir eses centros de maiores, un modelo que fixe poboación, que permita que a xente non se desarraigue e sigan nese territorio. Ese é o modelo da Deputación”, presumiu.