EFE | O Servizo Galego de Saúde (Sergas) está moi pendente da evolución dun gromo detectado esta semana na cidade de Lugo que afecta de momento a uns quince mozos, a maioría con idades ao redor dos vinte anos. Xa se están a realizar os correspondentes rastrexos e cribados para tratar de cortar as cadeas de transmisión canto antes.
Barállase a posibilidade, informaron á prensa, de que estes contaxios estean relacionados, precisamente, coas reunións de estudantes que se produciron durante a Semana Santa, e por iso é polo que nos últimos días as autoridades sanitarias centraron o seu esforzo en definir “a trazabilidade deses casos, precisamente para impedir que vaian a máis”.
Confirmouno o xerente da área Sanitaria de Lugo, A Mariña e Monforte de Lemos, Ramón Ares, quen aclarou que a maioría dos infectados son persoas moi novas, “duns vinte anos”.
Ares non ocultou que esta situación preocupa ás autoridades sanitarias, por temor a novas cadeas de contaxio que poidan contribuír a expandir o coronavirus. Aínda que “son poucos casos”, Ares fixo un chamamento “a non baixar a garda” e a manter as medidas de prevención xa coñecidas fronte ao Covid-19.
