A Asociación de Químicos de Galicia e o Colexio Oficial de Químicos de Galicia buscan o mellor alumnado en química dos centros educativos de Lugo e a súa provincia a través da XXXVIII Olimpíada Galega de Química 2021. As probas serán presenciais e celébranse hoxe, venres 12 de marzo, na Facultade de Ciencias.
As cidades da Coruña, Lugo, Santiago, Ourense e Vigo acollen simultaneamente ese mesmo día as probas da XXXVIII Olimpíada Galega de Química dirixida ao alumnado de bacharelato dos centros educativos da comunidade. Nas cinco cidades as probas comezarán ás 16.30 horas. Haberá dúas partes. A primeira, de 16.30 a 17.30 horas, será tipo test. A segunda parte, de 18.00 a 19.00 horas, consistirá en dous problemas e un suposto práctico de laboratorio.
Despois dun intenso traballo de organización durante os últimos meses por mor da incidencia da pandemia no ámbito da docencia, a Asociación de Químicos de Galicia e o Colexio Oficial de Químicos de Galicia, liderados por Manuel Rodríguez Méndez, conseguiron que as probas da XXXVIII Olimpíada Galega de Química fosen este ano presenciais. A cita non puido celebrarse no 2020, pois etaban previstas para o mesmo día no que se anunciou o inicio do confinamento.
