InicioSociedadeO centro de atención a maiores de Pedrafita do Cebreiro abrirá esta...

O centro de atención a maiores de Pedrafita do Cebreiro abrirá esta primavera

A xunta de goberno provincial aprobou este venres iniciar a contratación das prestacións básicas da residencia, último paso para a posta en marcha do xeriátrico.

PUBLICADA O

- Advertisement -

A Deputación de Lugo conta abrir o Centro de Atención a Maiores (CAM) de Pedrafita do Cebreiro esta mesma primavera. Avanzouno este venres a voceira socialista do goberno provincial, Pilar García Porto, nunha rolda de prensa posterior á xunta de goberno, na que se aprobou a apertura dun procedemento negociado para a contratación das prestacións básicas desta residencia, o último paso administrativo para poñela en marcha.

García Porto explicou que o contrato inclúe as prestacións de cociña, limpeza e asistencia básica para o centro. O importe de licitación é de 771.871€ para prestar este servizo ata xuño de 2022. “Trátase dun servizo 100% público que favorecerá a calidade de vida e o benestar das persoas maiores, e a conciliación, pero que ademais dinamiza a economía local e crea postos de traballo, o que contribuirá a fixar poboación neste concello e na zona”, incidiu a Deputada.

O CAM de Pedrafita do Cebreiro contará con 30 prazas de residencia e 20 de centro de día. “A nosa previsión é abrir este centro na primavera, dotando a Pedrafita desta prestación pública tan necesaria e tan desexada polos veciños e veciñas. Logo, como xa temos avanzado, a mediados de ano temos prevista a apertura da residencia de Meira e no segundo semestre, a de Navia de Suarna”, detallou.

Desta forma, a Deputación de Lugo pasará de ter as 5 residencias actuais –en Trabada, Ribadeo, Pol, A Fonsagrada e Castroverde-  a contar con 8 en funcionamento, coas de Pedrafita, Meira e Navia de Suarna.

OUTROS ASUNTOS NA XUNTA DE GOBERNO

A licitación das prestacións básicas da residencia de Pedrafita foi un dos contratos que saíu adiante na xunta de goberno celebrada hoxe, que en total suman un importe de 930.000€. Deste xeito, tamén se aprobou a adxudicación dos seguros necesarios para a prestación do servizo das rutas fluviais pola Ribeira Sacra en catamarán. O contrato adxudícase por un total de 16.210€. O seguro inclúe a responsabilidade civil, o seguro obrigatorio de viaxeiros e o seguro de cascos das embarcacións e equipos.

Tamén saíu adiante a adxudicación dunha póliza de seguros de accidentes por 84.500€ para os participantes e alumnos das actividades e cursos organizados pola institución provincial, e tamén para os usuarios e usuarias dos Centros de Atención a Maiores. Este contrato ten unha vixencia de 2 anos, con opción a prórroga ata os 4 anos máximo.

Así mesmo, aprobouse a adxudicación do servizo de inspección e mantemento das instalacións de protección contra incendios nos edificios da Deputación por preto de 58.000€, cunha vixencia de dous anos.

OBRAS EN FRIOL

Por outra parte, a  xunta de goberno aprobou unha solicitude do Concello de Friol para poder investir remanentes do Plan Único 2020 en dúas obras. Unha delas, cun investimento provincial de máis de 43.000€, servirá para pavimentar as vías de acceso aos núcleos de Bra, Lea e Montecelos. E a outra, co financiamento da Deputación de máis de 26.000€, servirá para pavimentar as vías de acceso á Cooperativo e a Casas da Noite.

ÚLTIMAS

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...